21 fevral 2025-ci il tarixində TƏBİB-in dəstəyi, Hacıqabul Rayon Mərkəzi Xəstəxanasının təşkilatçılığı ilə “Səhiyyə Xidmətlərində Hüquqi Yanaşma” mövzusunda regional forum keçirilib. Tədbirdə 10 regionun səhiyyə və hüquq sahəsində çalışan rəhbər şəxsləri iştirak edərək səhiyyə sistemində hüquqi tənzimləmələrin əhəmiyyətini vurğulayıblar. “Konstitusiya ili” çərçivəsində təşkil olunan forumda səhiyyə və hüquq sistemlərinin qarşılıqlı əlaqəsi müzakirə olunub. Forumda həmçinin Sabirabad 1 saylı Mediasiya Təşkilatının rəhbəri Musa Ramazanov və mediator Namik Hüseynov iştirak edib.

Forumun açılış nitqi ilə Hacıqabul Rayon Mərkəzi Xəstəxanasının direktoru, infeksionist həkim Natiq Əliyev çıxış edib. Daha sonra Milli Məclisin sədr müavini Rəfael Hüseynov, TƏBİB-in İcraçı direktorunun müavini Anar İsrafilov, Milli Məclisin deputatı Tahir Rzayev, Azərbaycan Səhiyyə İşçiləri Həmkarlar İttifaqının sədri Elnara Muradova, Hacıqabul Rayon Prokuroru, Baş Ədliyyə Müşaviri Lalə Hüseynova və TƏBİB-in Hüquq Departamentinin rəhbəri Aynur Hüseynova söz alıb.

Çıxışlardan sonra Forumda səhiyyə sahəsində hüquqi xidmətlərin təkmilləşdirilməsi, səhiyyə işçilərinin hüquqlarının qorunması və vətəndaşların keyfiyyətli tibbi xidmətə çıxış imkanlarının artırılması istiqamətində müzakirələr aparılıb. Tədbir iştirakçıları səhiyyə-hüquq əməkdaşlığının daha da inkişaf etdirilməsinin və bu mövzuda mütəmadi olaraq forumların təşkil edilməsinin vacibliyini vurğulayıb.