Oxucu soruşur, mediator cavablayır — Rubrikanın qonağı: Hümmət Əliyev

Oxucu soruşur, mediator cavablayır
Rubrikanın qonağı — Quba 1 saylı MTN-nin direktoru, mediator – hüquqşünas Hümmət Əliyev
2-ci həftənin müsahibəsi
“Mediasiya – mübahisəni qalibiyyətlə deyil, razılaşma ilə bitirmək yoludur”
Quba 1 saylı Mediasiya Təşkilatının direktoru, hüquqşünas mediator Hümmət Əliyev “Oxucu soruşur, mediator cavablayır” rubrikası üçün mediasiya ilə bağlı ən çox verilən sualları cavablandırır.

1. Mediator kimdir?
   Mediator mübahisə yaşayan tərəflərə kömək edən neytral (bitərəf) şəxsdir. O, hakim deyil və tərəflərin yerinə qərar vermir. Mediatorun əsas işi tərəfləri bir masa arxasında toplayaraq onların sakit və konstruktiv şəkildə danışmasına şərait yaratmaqdır.
   Yəni mediator problemi həll etmir – tərəflərin özlərinin həll tapmasına kömək edir.

2. Mediator qərar verə bilərmi?
   Xeyr. Mediator qərar vermir və hökm çıxarmır.
   Mediasiyada qərarı yalnız tərəflər özləri qəbul edir. Əgər razılıq əldə olunursa, bu, qarşılıqlı anlaşma nəticəsində baş verir. Mediator sadəcə prosesi idarə edir və ünsiyyəti düzgün istiqamətləndirir.

3. Neytrallıq necə qorunur?
   Neytrallıq mediasiyanın əsas prinsipidir. Mediator hər iki tərəfə eyni münasibət göstərir, hər kəsi diqqətlə dinləyir və heç kimin mövqeyini üstün tutmur.
   Əgər mediatorun tərəflərdən biri ilə hər hansı şəxsi və ya peşəkar əlaqəsi varsa, bu barədə əvvəlcədən məlumat verilməlidir. Əks halda, prosesdə iştirak etməməlidir. Çünki etibar mediasiyanın təməlidir.

4. Mediator tərəf saxlaya bilərmi?
   Qətiyyən yox.
   Mediator tərəf saxlayarsa, mediasiyanın mənası itər. Bu halda tərəflər özlərini təhlükəsiz və ədalətli mühitdə hiss etməzlər. Ona görə də mediatorun bitərəfliyi həm etik, həm də hüquqi tələbdir.

5. Mediatora etibar necə yaranır?
   Etibar bir neçə əsas amilə söykənir:
   Mediatorun peşəkarlığı
   Konfidensiallığın (məxfiliyin) qorunması
   Hər iki tərəfə hörmətli yanaşma
   Açıq və şəffaf ünsiyyət
   Tərəflər gördükdə ki, mediator heç kimin tərəfində deyil və proses ədalətli aparılır, etibar təbii şəkildə formalaşır.

Nəticə
Mediasiya mübahisəni uzatmaq üçün deyil, anlaşma ilə başa çatdırmaq üçün mövcuddur. Burada məqsəd qalib və məğlub müəyyən etmək deyil, hər iki tərəf üçün qəbul edilə bilən bir həll tapmaqdır.
Unutmayaq: Bəzən ən böyük qələbə qarşı tərəfi məğlub etmək deyil, ortaq razılığa gəlməkdir.
Suallarınız var? Ünvanlayın.
Cavabı mediativ yanaşma ilə alın.
Ünvan: Quba şəhəri, Heydər Əliyev prospekti, “İlqaroğlu” Business Center, II mərtəbə.
Tel.mob: (+994) 77 250.77.44, (+994) 77 450.77.44
E/ünvan: quba1@mediasiya.gov.az
Şabran ofisi:
Ünvan: Şabran şəhəri, Zərifə Əliyev küç., (Şabran Məhkəməsinin qarşısı)
Tel.mob: (+994) 77 588.77.44